Biz ham futbol ko’ramiz

Futbol millionlar o’yini.  Bundan 3 yil oldin Jahon chempionatining  AQSH-Gana  uchrashuvini  uyda oynai jahon orqali tomosha qilayotgan  amerikalik bir fanat sevimli jamoasining mag’lubiyati chidolmay,  jahl ustida 3 oylik bolasini urib halok qilgan edi. Ha, fanatizmga qattiq berilib ketish yaxshi oqibatlarga olib kelmasligi bir necha bor isbotini topgan. Xo’sh, ayollarimiz erkaklarning futbol ko’rishiga qanday fikr bildirishar ekan? Bu borada “Bo’ston” sihatgohida dam olayotgan ayollar va KO faollarining fikrlari bilan qiziqdik.

 Shaxlo Karimova  (sihatgoh hodimi):

–        Erkaklarning hamma narsani unutib qo’yib, futbol yoki biror o’yinning ichiga kirib ketishlariga qarshiman. Hammasi me’yorida bo’lishi kerak. Lekin ba’zan o’g’illarim bilan birga o’zim ham millionlar o’yinini ko’rib turaman.

 Farida Yo’ldosheva (Oshxona xodimi):

–         Biz oilaviy futbol ishqibozimiz. O’g’lim “Liverpul”, turmush o’rtog’im “Tottenxem”ga, o’zim esa “Arsenal”ga muxlislik qilaman. Lekin men ba’zida konsert ko’rmoqchi bo’lsam, ular bilan tortishib qolamiz.  Axir, erkaklar futbol turganda konsert ko’risharmidi?

 Muqaddas Taylanova (KO faoli):

–         Menga futbol yoqmaydi. Akam yoki ukam futbol ko’rayotgan bo’lsa boshqa kanalga olaman. Boisi, ba’zida dars qilayotganimda baqir-chaqir qilib, menga halaqit berishadi.

 Mohiya Zaynutdinova (dam oluvchi):

–        Xonadonimizda ham, qo’shnilarimizda ham yarim tungacha futbol ko’rib chiqiladi. Bunga ko’nikib ketganman. Soat 2-3 larda futbol bo’ladigan bo’lsa, kofe, choylarini damlab, uxlab qolmay deb navbatchilikda turishadi. Navbatchi  odam futbol boshlansa butun oilamiz a’zolarini uyg’otib, ertalabgacha futbol ko’rib chiqishadi. Lekin xudoga shukrki, uyimizda tosh oynalar sinmaydi.

 Gulruh Abduhalimova (Internet PR faoli): 

–        Meni futbolga bo’lgan munosabatim ijobiy. Uyimizda dadam, akam, ukalarimga qo’shilib onam, ba’zida esa o’zim ham qo’shilib futbol ko’rib turaman.  Ba’zi erkaklarning futbol ko’rmasligiga hayron qolaman. Qanday qilib futbol ko’rmaslik mumkin? Shunaqa yigitlar borki, futbolning o’rniga serialmi yoki kino ko’rishadi. Rosti bunday bollarni tushunmayman. O’ylaymanki, erkak kishi baribir futbol ko’rishi kerak.

 Umida Qodirova (KO faoli): - Dadam futbol ko’rayotganlarida men ularga hamrohlik qilishim mumkin.  Futbol ko’ruvchilarga qarshiligim yo’q.

 Abdurashidbek_saidov intervyusi